Naxçıvan Muxtar Respublikasının Mədəniyyət naziri vəzifəsinin müvəqqəti icraçısı, nazir müavini Həsən Seyidov AMEA Arxeologiya və Antropologiya İnstitutu Arxeoloji Texnologiya və Ölçü Layihə şöbəsinin müdiri, t.ü.f.d., dos. Qəhraman Ağayevi, Milli Azərbaycan Tarixi Muzeyinin Arxeologiya elmi fond şöbəsinin elmi işçisi, t.ü.f.d. Emin Məmmədovu və Şahtaxtı Tunc dövrü Arxeoloji ekspedisiya üzvlərini qəbul edib. Qəbulda Şahtaxtı kəndində yerləşən arxeoloji və tarixi-memarlıq abidələrinin, ümumilikdə isə maddi mədəni irsimizin öyrənilməsi, mühafizəsi və təbliği barədə fikir mübadiləsi aparılıb. Qəhraman Ağayev Şahtaxtı abidələrində aparılmış arxeoloji qazıntılarla bağlı məlumat verərək bildirmişdir ki, ərazidəki abidələrin əksəriyyətində Eneolit dövrünə aid tapıntılara rast gəlinmişdir. Emin Məmmədov isə keçən əsrdə Şahtaxtıdan, eləcə də Naxçıvanın digər rayonlarından aşkar edilmiş nadir arxeoloji materiallar haqqında danışıb, eyni zamanda həmin materilların Milli Azərbaycan Tarixi Muzeyinin ekspozisiyasında sərgilənməsi ilə bağlı məlumat verib. E.Məmmədov qeyd edib ki, muzeyin arxeoloji kolleksiyasında yer almış həmin materiallar Azərbaycan xalqının qədim mədəni irsini əks etdirir. Görüşdə mədəni, o cümlədən arxeoloji irsin öyrənilməsi və mühafizəsinin gələcəkdə də davam etdirilməsinin vacibliyi bildirilib.

Sonda xatirə fotoşəkilləri çəkilib.