Milli Azərbaycan Tarixi Muzeyində Yeni Azərbaycan Partiyası Səbail rayon təşkilatının “Z.Tağıyev küç. 4” (Azərbaycan Milli Tarix Muzeyi) ərazi partiya təşkilatının təşəbbüsü ilə Milli Qurtuluş Gününə həsr olunmuş tədbir keçirilib. Azərbaycan Respublikasının Dövlət Himni səsləndirildikdən sonra Ümummilli lider Heydər Əliyevin və Azərbaycanın ərazi bütövlüyü uğrunda canlarından keçən şəhidlərin xatirəsi bir dəqiqəlik sükutla yad edilib. Tədbiri Yeni Azərbaycan Partiyası Səbail rayon təşkilatının “Z.Tağıyev küç. 4” ərazi partiya təşkilatı sədri, muzeyin aparıcı elmi işçisi, t.ü.f.d., dosent Bəhmən Kərimov açıb. B.Kərimov qeyd edib ki, Milli Qurtuluş Gününün Azərbaycanın müasir tarixində xüsusi yeri və böyük əhəmiyyəti var. Sonra Yeni Azərbaycan Partiyasının Mərkəzi Aparatında partiyanın Veteranlar Şurasının üzvü, siyasi elmlər doktoru Tahir Məmmədov əlamətdar günlə bağlı çıxış edib. T.Məmmədov bildirib ki, “1993-cü ilin 15 iyun tarixi Heydər Əliyevin Azərbaycan Ali Sovetinin Sədri seçilməsi ilə bağlıdır və ölkənin siyasi sabitliyinin bərpası baxımından mühüm bir dönüş nöqtəsi olub. Bu tarix Azərbaycan xalqının milli birliyini, dövlətçiliyini və müstəqilliyini qorumaq üçün atdığı addımları simvollaşdırır”.

Sonda qonaqlar muzeyin yeni açılan ekspozisiyasını ziyarət ediblər.