“YUNESCO üzrə Rusiya Federasiyası Komitəsinin Xəbərləri” jurnalının baş redaktoru, “Oleq Paxmutov” nəşriyyatının təsisçisi Oleq Paxmutov, tədqiqatçı numizmat Mustafa Şabanov və “Xəzər” Muzey Mərkəzinin təsisçisi Səyavuş Əlizadə Milli Azərbaycan Tarixi Muzeyini ziyarət ediblər.
Sözügedən nəşriyyatda son illərdə tarixə yardımçı fənnlər- numizmatika, bonistika və d. üzrə bir sıra əsərlər nəşr edilib. O cümlədən, 2022-ci ildə azərbaycanlı bonist tədqiqatçı Habil Zeyniyevin müəllifliyi ilə “Azərbaycanın kağız pul nişanlarının ensiklopediyası” (Энциклопедия бумажных денежных знаков Азербайджана. Москва: Изд. Олега Пахмутова, 2022, 532 с.) kitab-kataloqu da bu nəşriyyatda işıq üzü görüb.

Qeyd edək ki, muzeyin Köməkçi Tarixi Fənn Materialları Fondunun müdiri, t.ü.f.d., dosent Sənubər Qasımovanın köməkliyi ilə sözügedən kataloqda muzeyin dəyərli materialları sayılan, Azərbaycanın kağız pulları da yer alıb (XIX – XX əsrlər).

Muzeyin yeni ekspozisiyası ilə tanış olan qonaqlar muzeydən xoş təəssüratla ayrılıblar. Eyni zamanda, Oleq Paxmutov rəhbərlik etdiyi nəşriyyatın son illərdə işıq üzü görən nəşrlərini muzeyin əməkdaşlarına hədiyyə edib.