Xantı-Mansiysk Təbiət və İnsan Muzeyinin (Rusiya Federasiyası) direktoru, coğrafiya elmləri namizədi, çoxsaylı elmi məqalə və nəşrlərin, elmi-populyar film və bələdçi kitablarının müəllifi İvan Aleksandroviç Yaşkovun redaktorluğu ilə növbəti Atlas- «Атлас переработки нефти и газа» (Neft və qaz emalı Atlası) nəşr olunub (Yekaterinburq: Basko nəşriyyatı, 2024, 256 s.).

Sözügedən Atlasda Milli Azərbaycan Tarixi Muzeyinin fondlarında qorunan materiallar, eyni zamanda, böyük mesenat, xeyriyyəçi Hacı Zeynalabdin Tağıyev, kimya elmləri doktoru, akademik Yusif Məməmmədəliyev haqqında məlumatlar yer alıb. Həmçinin, nəşrin hazırlanması üçün bir sıra ölkələrin muzey, dövlət, korporativ, universitet fondlarının, yanacaq-energetika şirkətlərinin və ictimai təşkilatların arxivlərinin materialları da cəlb edilib. Həmin materiallar muzeyin Beynəlxalq əlaqələr və ictimaiyyətlə iş şöbəsinin elmi işçisi, t.ü.f.d. Fuad Ağayev tərəfindən toplanmış və sistemləşdirilmişdir.

Qeyd edək ki, Atlas “Neft və Qaz Tarixi” elmi-populyar seriyasını tamamlayan neft emalı və neft-kimya sahəsində ən mühüm tarixi hadisələrin illüstrasiyasıdır.