Bu gün dahi şəxsiyyət, tanınmış bəstəkar Üzeyir Hacıbəylinin doğum günü münasibətilə ölkəmizdə Milli Musiqi Günü qeyd olunur. 1995-ci ildə Azərbaycan Respublikasının Prezidenti Heydər Əliyevin Fərmanı ilə dahi bəstəkarın anadan olmasının 110 illik yubileyi ərəfəsində 18 sentyabrın Milli Musiqi Günü kimi qeyd olunması qərara alınıb. Üzeyir Hacıbəyli Azərbaycan milli musiqisinin banisi olmaqla yanaşı, ilk operanın, ilk musiqili komediyanın və bir çox janrlarda əsərlərin müəllifi olaraq tarixdə silinməz iz qoyub.
Milli Azərbaycan Tarixi Muzeyinin yeni ekspozisiyasında Üzeyir Hacıbəylinin həyatına və yaradıcılığına aid olan dəyərli eksponatlar nümayiş olunur. Bu nümunələr Ü.Hacıbəylinin zəngin musiqi irsini, pedaqoji və ictimai fəaliyyətini işıqlandıraraq, ziyarətçilərdə böyük maraq yaradır.
