Azərbaycan Respublikasının Dövlət Himni səsləndirildikdən sonra tədbir iştirakçıları ölkəmizin azadlığı və ərazi bütövlüyü uğrunda şəhid olan hərbçilərimizin xatirəsini bir dəqiqəlik sükutla yad ediblər.

Tədbirdə Azərbaycan Respublikasının Milli Məclisinin deputatları- professor Musa Qasımlı, tarix üzrə fəlsəfə doktoru Naqif Həmzəyev, Azərbaycan Respublikasının Gənclər Fondunun şöbə müdiri Pərviz Mirələmli, Azərbaycan Respublikasının Gənclər Təşkilatları Milli Şurasının sədri Rafael Hacıbəyli , “Böyük Qayıdış” Gənclər Təşkilatının sədri Nail Şükürov, muzeyin Vətən Müharibəsinin müdiri Şəfa Mövsümov , Xocalı şahidi Xəzangül Əmirova, Vətən Müharibəsinin qaziləri, muzey əməkdaşları və KİV nümayəndələri iştirak ediblər.

Çıxışçılar qeyd ediblər ki, Xocalı soyqırımı Azərbaycan xalqının qan yaddaşında silinməz iz buraxan faciələrdən biridir. Həmin gecə dinc sakinlər – uşaqlar, qadınlar, yaşlılar amansızcasına qətlə yetirildi, şəhər isə yerlə-yeksan edildi. Bu dəhşətli cinayət təkcə Azərbaycana deyil, bütövlükdə bəşəriyyətə qarşı törədilmiş bir vəhşilikdir.

Daha sonra “Xocalı Həqiqətləri Rəqəmsal Sənətdə”- foto müsabiqəsinin qaliblərinin mükafatlandırma mərasimi keçirilib.

Sonda iştirakçılar “Xocalı Yaddaşımız” adlı sərgiyə baxış keçirərək, faciənin dəhşətlərini əks etdirən fotolarla tanış olublar.