Rusiyanın Altay diyarının Barnaul şəhəri “Лукoморы” yaradıcılıq birliyinin əməkdaşı, gəlincik ustası Yelena Aleksandrovna Volf Milli Azərbaycan Tarixi Muzeyinin Etnoqrafiya elmi fond şöbəsinə növbəti dəfə səfər edib. O, fondun oyuncaqlar kolleksiyasında tədqiqat apararaq, maraqlı məlumatları qeyd edib. Mütəxəssis, həmçinin Rusiyanın Etnoqrafiya Muzeyində qorunan, Azərbaycana məxsus yeganə gəlincik nümunəsi ilə bağlı məlumat verib. Bildirib ki, həmin unikal gəlincik nümunəsi 1915-ci ildə dahi bəstəkar Üzeyir Hacıbəyovun qardaşı Ceyhun Hacıbəyov tərəfindən həmin muzeyə təqdim olunub. İncə zövqlə hazırlanan sözügedən gəlincik dəqiq və mütənasib bədən ölçüləri, zərif üz cizgiləri, təbii tükdən düzəldilmiş saçları və birçəkli quruluşu ilə diqqət çəkir. Gəlincik milli geyimlərimizdən olan köynək, arxalıq və kürdü ilə bəzədilib, başında isə qızılı parçadan tikilmiş uzun örpək var.

Milli Azərbaycan Tarixi Muzeyinin gəlincik kolleksiyası əsasında hazırlanmış “Azərbaycan ailəsinin uşaq dünyası” adlı kitab-albom haqqında linkə keçid edərək ətraflı məlumat əldə edə bilərsiniz.