Azərbaycan Respublikasının Dövlət Himni səsləndirildikdən sonra tədbir iştirakçıları Ulu Öndər Heydər Əliyevin, ölkəmizin azadlığı və ərazi bütövlüyü uğrunda şəhid olan hərbçilərimizin xatirəsini bir dəqiqəlik sükutla yad edib.

Daha sonra YAP Səbail rayon təşkilatının sədri Muxtar Nağıyev çıxış edərək 44 günlük Vətən Müharibəsində Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə şanlı Ordumuzun göstərdiyi qəhrəmanlıqlardan danışıb. Sonra Milli Məclisin deputatı Ceyhun Məmmədov və Muzeyin direktoru, akademik Nailə Vəlixanlı çıxış edərək, Vətən Müharibəsinin tarixi əhəmiyyətini və əldə olunan qələbələrimizi vurğulayıblar.

Tədbirdə, həmçinin Vətən Müharibəsi şəhidi çavuş Elşən Müslümovun anası Şövqiyyə Müslümova, qazi Radif Mustafayev, şəhid çavuş Səid Cəfərovun bacısı Aygün Cəfərova, şəhid gizir Fəqan Zalovun qardaşı, qazi Nicat Zalov, eləcə də Xüsusi Təyinatlı Qüvvələrin kapitanı, şəhid Həmidağa Hüseynzadənin atası Bağı Hüseynov çıxış ediblər.

Sonda YAP Səbail rayon təşkilatının üzvləri Vətən uğrunda canından keçmiş şəhidlərin xatirəsinin daim uca tutulmasının və gənc nəslin vətənpərvərlik ruhunda tərbiyəsinin vacibliyini vurğulayıblar.