17 aprel 2026-cı il tarixində Milli Azərbaycan Tarixi Muzeyində “Şəhərsalma və Memarlıq İli” çərçivəsində elmi-maarifləndirici tədbir təşkil olunub. Tədbir Yeni Azərbaycan Partiyasının Səbail rayon təşkilatı ilə birgə həyata keçirilib.

Tədbirdə muzeyin rəhbərliyi və əməkdaşları, Azərbaycan Universiteti və Azərbaycan Maliyyə-İqtisad Kollecinin tələbələri, eləcə də ictimaiyyət nümayəndələri iştirak ediblər. İlk olaraq Azərbaycan Respublikasının Dövlət Himni səsləndirilib, daha sonra şəhərsalma və memarlığın müxtəlif dövrlərini əks etdirən videoçarxlar nümayiş olunub.

Tədbirdə çıxış edən Səbail rayon təşkilatının sədri Muxtar Nağıyev “Şəhərsalma və Memarlıq İli”nin əhəmiyyətindən bəhs edərək, bildirib ki, ölkədə şəhərsalma siyasəti müasir dövrdə davamlı inkişaf prinsiplərinə əsaslanır. 

Daha sonra muzeyin Arxeologiya elmi fond şöbəsinin müdiri, tarix üzrə fəlsəfə doktoru, dosent Nasir Quluzadə “Azərbaycan ərazisində qədim şəhərsalma ənənələri (arxeoloji materiallar əsasında)” mövzusunda məruzə ilə çıxış edib. Məruzədə qədim yaşayış məskənlərində aparılmış arxeoloji tədqiqatların nəticələri əsasında ilkin şəhərsalma elementləri, müdafiə qurğuları, küçə-planlaşdırma sistemləri və ictimai tikililərin formalaşma xüsusiyyətləri geniş şəkildə təhlil olunub. 

Tədbirdə, həmçinin Yeni Azərbaycan Partiyasının Səbail rayon təşkilatının Muzey üzrə ərazi təşkilatının sədri, tarix elmləri doktoru, dosent Bəhman Kərimov “XIX–XX əsrlərdə Azərbaycanda şəhərsalma və memarlığın inkişafı tarixindən” mövzusunda çıxış edib. B.Kərimov, xüsusilə neft sənayesinin inkişafı ilə əlaqədar olaraq Bakı şəhərinin şəhərsalma strukturunda baş verən dəyişiklikləri, Avropa memarlıq üslublarının təsirini və milli memarlıq ənənələrinin qorunub saxlanılması məsələlərini diqqətə çatdırıb.

Çıxışlarda Ümummilli Lider Heydər Əliyevin və Azərbaycan Respublikasının Prezidenti İlham Əliyevin şəhərsalma və memarlıq irsinin qorunması və inkişaf etdirilməsi sahəsindəki rolu xüsusi vurğulanıb. Bildirilib ki, Heydər Əliyevin rəhbərliyi dövründə tarixi-memarlıq abidələrinin mühafizəsi və bərpası istiqamətində mühüm addımlar atılaraq müvafiq qanunvericilik bazası formalaşdırılıb və bu siyasət İlham Əliyevin rəhbərliyi ilə uğurla davam etdirilərək ölkənin müxtəlif bölgələrində, o cümlədən işğaldan azad olunmuş ərazilərdə genişmiqyaslı bərpa və yenidənqurma işləri həyata keçirilir.

Tədbirin sonunda mövzu ətrafında fikir mübadiləsi aparılıb, suallar cavablandırılıb və bu kimi elmi-maarifləndirici tədbirlərin davamlı keçirilməsinin əhəmiyyəti vurğulanıb.