Bu gün Azərbaycan bəstəkarı və rəssamı, SSRİ xalq artisti (1986), Azərbaycan SSR xalq artisti (1978), professor (1979), Azərbaycan SSR Dövlət mükafatı laureatı (1986), Azərbaycan Elmlər Akademiyasının müxbir üzvü (2001), həqiqi üzvü (akademik.2014) Arif Cahangir oğlu Məlikovun doğum günüdür.

Arif Cahangir oğlu Məlikov 13 sentyabr 1933-cü ildə Bakı şəhərində anadan olub. O, 1960-ci ildə Üzeyir Hacıbəyov adına Azərbaycan Dövlət Konservatoriyasını Qara Qarayevin bəstəkarlıq sinfi üzrə bitirmişdir. Həmin ildən orada dərs deməyə başlamış, ömrünün sonuna kimi orada professor və bəstəkarlıq kafedrasının müdiri kimi çalışmışdır. Bəstəkar Arif Məlikovun yaradıcılığı parlaq istedad və özünəməxsuluq ilə səciyyələnir. O, öz əsərlərində milli musiqi ənənələrini XX əsr musiqisinin nailiyyətləri ilə birləşdirərək mütərəqqi təfəkkürə malik sənətkar kimi çıxış etmişdir. Onun yaradıcılığına yüksək ideya, dolğun məzmun, obrazların dərin emosional-psixoloji ifadəsi xasdır. Görkəmli türk şairi Nazim Hikmətin librettosu əsasında yazdığı ilk böyük əsəri - "Məhəbbət Əfsanəsi" baleti Arif Məlikova dünya şöhrəti qazandırdı. 

Milli Azərbaycan Tarixi Muzeyinin Sənədli mənbələrin elmi fond şöbəsində Arif Məlikova məxsus "Yürüş" əsərinin not yazısı, Foto-neqativ materialları fondunda isə foto neqativ qorunur. 

Müəllif "Yürüş" əsərinin üz səhifəsinin aşağı hissəsində həmin not yazısını Azərbaycan Tarixi Muzeyinə bağışladığını qeyd etmişdir.