Torpaqlarımızın işğaldan azad edilməsi uğrunda gedən Vətən müharibəsi zamanı qəhrəmancasına döyüşərək şəhidlik zirvəsinə ucalmış igidlərimizdən biri də Azərbaycan Silahlı Qüvvələrinin əsgəri  Sayad Hacıyevdir. Bu gün şəhid Sayad Hacıyevin doğum günündən 21 il ötür.

Sayad Azad oğlu Hacıyev 2001-ci il martın 14-də Zaqatala rayonunun Bazar kəndində anadan olub. İlk təhsilini Bakı şəhəri 316 saylı tam orta məktəbdə almışdır. 2015-ci ildə isə Bakı Şəhəri Dövlət Dəmir yolu liseyinə qəbul olunub. Musiqiyə həvəsi olduğuna görə piano kursunda da dərs alıb.

Sayad Hacıyev 2019-cu ildə müddətli həqiqi hərbi xidmətə çağırılıb. Azərbaycan Silahlı Qüvvələrinin Yevlax rayonunda yerləşən "N" saylı hərbi hissəsində xidmət edib.

Sayad Hacıyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib. Oktyabrın 17-də Suqovuşan döyüşləri zamanı qəhrəmancasına şəhid olub. Zaqatala rayonunun Bazar kəndində dəfn edilib.

Azərbaycan Prezidenti İlham Əliyevin Sərəncamına əsasən Sayad Hacıyev ölümündən sonra "Vətən uğrunda" medalı və "Suqovuşanın azad olunmasına görə" medalı ilə təltif edilib.

Qeyd edək ki, şəhid Sayad Hacıyevin şəxsi əşyaları ailəsi tərəfindən muzeyə təhvil verilib. Materiallar hal-hazırda şəhidlərimizin əziz xatirəsini əbədiləşdirmək məqsədilə yaradılmış Milli Azərbaycan Tarixi Muzeyinin Vətən müharibəsi fondunda mühafizə olunur.