Milli Azərbaycan Tarixi Muzeyinin kolleksiyası Azərbaycanın təhsil tarixini əks etdirən dəyərli nümunələrlə zəngindir. Bunlardan biri də Zaqafqaziya (Qori) Müəllimlər Seminariyasının məzunu, görkəmli maarifçi, pedaqoq, publisist Səfərəli bəy Şıxhəsən bəy oğlu Vəlibəyova məxsusdur.

Səfərəli bəy Vəlibəyov 1861-ci ildə Şuşa şəhərində anadan olmuşdur. O, XIX əsr Azərbaycan pedaqoji tarixinin simalarından biridir. Səfərəli bəy Vəlibəyov Zaqafqaziya (Qori) müəllimlər seminariyasını bitirən ilk üç Azərbaycanlıdan biri olmuş, ömrünün 16 ilini pedaqoji işə sərf etmişdir. Bu müddət ərzində Cəlil Məmmədquluzadə, Nəriman Nərimanov, Süleyman Sani Axundov kimi görkəmli şəxsiyyətlər ibtidai təhsillərini Səfərəli bəy Vəlibəyovdan almışdır. S.Vəlibəyov 31 avqust 1902-ci il tarixində Şuşa şəhərində vəfat etmişdir.

Təqdim olunan gümüş qələm Səfərəli bəy Vəlibəyova məxsus olmuş və 1971-ci ildə nəvəsi Validə Ələsgər bəy qızı Bəylərbəyova (Ələsgər bəy Rəhim bəy oğlu Bəylərbəyovun və Sürəyya xanım Səfərəli bəy qızı Vəlibəyovun qızı) tərəfindən muzeyə təhvil verilmişdir. Qələmin üzəri palıd budağı və qozalarla bəzədilmiş, “Səfərəli” və “1893” sözləri yazılmışdır. Hazırda qələm muzeyin Xüsusi fondunda qorunur.