Qafqazın ən qədim toxuculuq mərkəzlərindən biri kimi tanınan Azərbaycan orta əsrlərdə Şuşada, Naxçıvanda, Şəkidə, Şamaxıda istehsal olunan pambıq, yun və ipək parçaları ilə ölkə hüdudlarından kənarda da tanınırdı. Həmin dövrdə Azərbaycanda geyimlərin hazırlanmasında istehsal edilən zərbaf, atlas, tafta, qanovuz, məxmər, darayı, mahud, kəşmir, tirmə və s. parçalardan, həmçinin bəzək elementi olan baftadan geniş istifadə olunurdu.

XIX əsrin sonu ‒ XX əsrin əvvəlinə aid zərbafta tətbiq olunmuş təqdim olunan qadın kəməri 1986-cı ildə Azərbaycan Tarixi Muzeyinə təhvil verilib. Gümüşdən olan bu kəmər Qarabağda istehsal olunub. Kəmər dəri qayışın üstünə tikilmiş, zərbaftaya bərkidilmiş iki hissə toqqadan ibarətdir. Zərbaftanın üzərində yeddi ədəd altıləçəkli gül formalı bəzək, on iki ədəd “əqrəbi” və on iki ədəd kiçik “qübbə” bərkidilib. Toqqa yar-yardan küsdü formasındadır, bütün səthi nəbati naxışlı, qazıma və qarasavat üsulu ilə işlənmişdir.