Milli Azərbaycan Tarixi Muzeyinin yeni ekspozisiyasının müxtəlif mövzulara həsr olunmuş vitrinlərində maddi nümunələr, arxeoloji tapıntılar yer alır. Ziyarətçilərin tariximizlə bağlı təsəvvürlərinin formalaşmasında rol oynayacaq vitrinlərdən biri də “Qafqaz Albaniyasının sənətkarlığı və beynəlxalq ticarət əlaqələri” mövzusuna həsr olunmuşdur. Sənətkarlığın müxtəlif sahələrinə aid nümayiş olunacaq eksponatlar e.ə IV – b.e VII əsrlərini əhatə edir.

Qeyd edək ki, təqdim olunan vitrinin divarındakı parça qalıqları, toxuculuq dəzgahının qalıqları, saxsı, sümük və mərmər əyircəklər, taxta iy başlıqları (1946-1953-cü illərdə Mingəçevirdə aparılmış arxeoloji qazıntılar zamanı tapılmışdır) Qafqaz Albaniyasında toxuculuq sahəsinin, aşağı hissədə yerləşdirilən saxsı qablar isə dulusçuluq sənətinin inkişaf səviyyəsini özündə ehtiva edir. Saxsı qablar müxtəlif illərdə Xınıslı (Şamaxı), Yaloylutəpə (Qəbələ), Ovçulu (Şamaxı), Mingəçevir və Nərgizava (Ağsu) abidələrindən tapılıb.

Sözügedən tarixi əhəmiyyətli eksponatlarla yaxın müddətdə tanış ola biləcəksiniz.