Azərbaycan qadınlarının milli geyim kompleksinin mühüm elementini baş geyimləri təşkil edir. Baş geyimləri arasından kəlağayını xüsusilə qeyd edə bilərik. Azərbaycanda milli geyimlərin hazırlanmasında ipək parçalardan istifadə olunduğu kimi kəlağayıların hazırlanmasında da əsasən ipəkdən istifadə olunub. Mütəxəssislərin fikrincə, hələ V-VI əsrlərdə Mingəçevirdə qızılı işləmələrlə hazırlanmış baş örtükləri– kəlağayının sələfi olan ipək yaylıqlar dəbdə olub. Azərbaycanda ipək parça emalı, parçanın rənglənməsi texnologiyalarının ən azı 300 yaşı var. XIII əsrdə isə italiyalı səyyah Marko Polo Şamaxı və Bərdədə toxunan ipək yaylıqların gözəlliyini təsvir edib. XVII əsrdə Azərbaycana gəlmiş holland səyyahı Yan Streys isə yazırdı ki, “Şamaxı bazarında xəz, gümüş və qızıl işləməli ipək yaylıqlar satılır”.