Azərbaycan xalçalarının forma, toxunma texnikası, süjet, ornament və kompozisiya rəngarəngliyi onların tədqiqi üçün əlverişli şərait yaradır. Azərbaycanın zəngin tarixi və mədəni mərkəzlərindən olan Şirvan bölgəsinin zəruri xammal bazasının, eyni zamanda bu bölgədə əsas məşğuliyyətlərdən biri toxuculuğun olması müxtəlif çeşiddə xalça və xalça məmulatı nümunələrinin ərsəyə gəlməsinə şərait yaratmışdır. Bu nümunələrə xalça, kilim, palaz, xurcun, çul, çanta, heybə, məfrəş kimi fərqli toxuculuq məmulatları daxildir. Şirvan qrupu xalçalarına əsasən Şamaxı, Ağsu, Mərəzə, Kürdəmir və Qazıməmməd (Hacıqabul) məntəqələrində toxunan xalçalar aid edilir.

Qeyd edək ki, Milli Azərbaycan Tarixi Muzeyinin Etnoqrafiya fondunun zəngin xalça kolleksiyasında 40-a yaxın Şirvan qrupu xalçası qorunur. Burada “Bico”, “Şirəlibəy”, “Qobustan”, “Ərçiman”, “Sor-sor”, “Qəbələ”, “Salyan” və s. çeşnilər mövcuddur. Təqdim olunan Şirvanın “Bico” xalçası sözügedən kolleksiyanın unikal nümunələrindəndir. Burada abstrakt şəkildə həndəsi və haşiyə zolağı üzərində stilizə edilmiş quş təsvirləri ardıcıl formada toxunmuşdur.

Zəngin bədii tərtibatı, əsasən təbii boyaq tərkibi ilə seçilən bu əsrarəngiz toxuculuq nümunəsi tezliklə muzeyin yeni ekspozisiyasında nümayiş olunacaq.