Milli Azərbaycan Tarixi Muzeyinin Vətən müharibəsi fonduna Azərbaycan Silahlı Qüvvələrinin Sərhəd Qoşunlarının kapitanı, Vətən müharibəsinin iştirakçısı olmuş şəhid Cavid Əhliman oğlu Bayramlıya məxsus materiallar daxil olub (DSX-ə məxsus kitel, şalvar, furajka, uçuşlara hazırlıq dəftəri, 2 ədəd Fəxri Fərman, 1 ədəd fotoşəkil, 2 ədəd isimlik, 1 ədəd döş nişanı və pilot uçuş qarnituru).

Kapitan Cavid Bayramlı 2020-ci il sentyabrın 27-də başlanan Vətən müharibəsi zamanı Zəngilanın azadlığı uğrunda gedən döyüşlərdə iştirak etmişdir. Cavid Bayramlı müharibədən sonra xidmətinə davam etmiş və döyüşlərdə iştirakına görə təltif edilmişdir.

30 noyabr 2021-ci il tarixində Azərbaycan Respublikası Dövlət Sərhəd Xidmətinin hərbi helikopteri Xızı rayonu ərazisində yerləşən "Qaraheybət" aviasiya poliqonunda təlim uçuşları yerinə yetirərkən qəzaya uğraması nəticəsində Cavid Bayramlı şəhid olmuşdur.

Şəhid Cavid Bayramlının şəxsi əşyaları muzeyin Sənədli mənbələrin elmi-fond şöbəsinin müdiri Esmira Rəhimovanın vasitəsilə muzeyə təhvil verilib.