Milli Azərbaycan Tarixi Muzeyində Xocalı faciəsinin 32-ci ildönümünə həsr olunmuş “Müharibə uşaqları...” adlı tədbir keçirilib. Tədbirdə Sabunçu rayonu 67 saylı tam orta məktəbin müəllim və şagirdləri, muzeyin əməkdaşları iştirak edib. Azərbaycan Respublikasının Dövlət Himni səsləndirildikdən sonra tədbir iştirakçıları ölkəmizin azadlığı və ərazi bütövlüyü uğrunda şəhid olan hərbçilərimizin xatirəsini bir dəqiqəlik sükutla yad edib.

Sonra muzeyin İnnovasiya və təhsil proqramları şöbəsinin əməkdaşı Aynur Babayeva iştirakçılara fotoslaydın müşayiəti ilə Xocalı soyqırımı haqqında ətraflı məlumat verib. A.Babayeva çıxışında vurğulayıb ki, Azərbaycan tarixinə ən dəhşətli və faciəli səhifələrdən biri kimi daxil olmuş Xocalı soyqırımı təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir.

Daha sonra Azərbaycan Respublikası Mədəniyyət Nazirliyinin sifarişi ilə “Yaddaş” sənədli filmlər studiyası tərəfindən 2014-cü ildə çəkilmiş Xocalı soyqırımına həsr olunan “Müharibə uşaqları...” adlı sənədli film nümayiş olunub (rejissor və ssenari müəlliflər- Şamil Nəcəfzadə, Sara Oğuz Nəzirova). Böyük maraqla izlənən filmin nümayişindən sonra şagirdlər soyqırımla bağlı şeirlər səsləndirib.

Tədbirdə Sabunçu rayonu 67 saylı tam orta məktəbin direktor müavini Azad Kələşov çıxış edərək, muzeyin rəhbərliyinə və tədbirin təşkilatçılarına belə maarifləndirici tədbirin keçirilməsinə görə öz dərin minnətdarlığını bildirib.

Tədbirin ikinci hissəsində şagirdlər arasında “Xocalı” yazısı ətrafında intellektual tapşırıq yerinə yetirilib və hər bir iştirakçı soyqırıma aid ilk düşündüyü fikri yazıb.

Sonda iştirakçılara H.Z.Tağıyevin ev-muzeyində ekskursiya aparılıb.